شموسة

و بعد صلاتنا و السلام.. على خير الأنام.. و من ربه كثير السلام..

كان ياما كان في سالف العصر و الأوان..

شفّع.. بالحيل رثة.. هدومهم.. 

أو باقيها.. لو حابين تقولوا..

هايمين في عالم.. ثاني.. خلقوهه ليهم..

ما أبيتهم و ما أظنهم.. أبوني..

في ذات البلد.. الكنت فيهو ماشي في درب.. 

لاحظتهم و ما أظنهم.. لاحظوني..

 شعورهم غطّاها.. التراب..

و تظنهم في العقد السادس.. من عمرهم..

من همهم و من زهج.. كسى وشوشهم.. 

غبشة.. في أسود نقاب.. 

من طفولتهم نهب البراءة.. و بريق عيونهم أصبح عماشة.. 

و كل حياتهم إغتراب..

لقيمتين

و بعد صلاتنا و السلام.. على خير الأنام.. و من ربه كثير السلام..

كان ياما كان في سالف العصر و الأوان..

و من صباحة الله الدُّغش.. و بعد ما أغسِّل وشيشي.. و قبل ما يمسِّح  دهان.. باقي أطرافي الغُبُش.. في إيدي  كانت تترمي شوية  قروش.. فيها الشِّلن فيها الريال.. طرّادة و جنيه كمان.. و بالتانية أشيل كورة حديد.. ماا هسَّة وقت قعدتها.. و كثير بيصادف ألمحها.. في مشيتها.. بسمتها.. البِصعوبة كانت تترسم.. و هي دابها داخلة معركة.. في حرب  خايضاها ديمة.. مع همَّها.. في سكون من غير نفير.. والدنيا باسراع تنحدر.. علّا لسه فيها باقي خير..

(يتبع)

الشفيع

حقوق الطبع و النشر و التوزيع محفوظة

أم ضفيرة

و بعد صلاتنا و السلام.. على خير الأنام..

 و من ربه كثير السلام..

كان ياما كان في سالف العصر و الأوان..

رصيف بصّات و لواري كثيرة.. محمَّلة..

شِنَط سفر.. قُفَف محشيَّة جِنِس حشي..

باستعجال من غير نظام.. مَدرفَسَة..

و كيمان جِداد من تحت اللواري مِربطنّها.. مَدنقَسة..

ماا الليلة دي يوم السَّفَر.. مع عُمدتين لي في الأهل..

خالي الكان توم.. و خالة هي أم السَّعَد..

خير الأَهل الجَد عَمَد..

في زيارةً  قدّموا لي فيها.. البَلَد..

سفرنا اليوم داك كان صَباح.. في وساع وطناً بَراح..

عَلاّ الأفق سرابه قَل..

إِتلاشى الرِّهاب.. و هسّه راح..

و لون أخضر بداله سال.. لمّا وصلنا بلد كريم..

مكيال عطيته لا بوقيةً لا بملوة..

بالشوّال..

(يتبع)

الشفيع

حقوق الطبع و النشر و التوزيع محفوظة

لحظة مغيرب

و بعد صلاتنا و السلام.. على خير الأنام.. و من ربه كثير السلام..

كان ياما كان في سالف العصر و الأوان..

لحظة مغيرب.. و الشمس ماشة تنخمد.. و شكل دافوري العيال.. قصدي نحن أولاد الجيران.. في الشارع كان إبتدا.. و احتدم.. الشعللته من غير قصد.. أصوات رجال في حينا.. المن قدام بيوتهم.. من فوق كراسي مجلدة.. كان عيَّنوا روحهم حكم.. و صوت أم زهجان لواحداً فينا.. كانت تلعن بيه لعب المغارب.. و تدعي على البيلعبه.. ما ينلحق.. يدسوهو من الدودو.. الأسد..

كنت أهج من غير وداع.. لم كان يعلى النباح.. ماا اتاني حنلعب كورة بكرة.. و هسة بترجع المراح.. و ده هسة ما وقت لعب.. وقت التمام لأمات وسم.. من طلعتن عز الصباح..

شيبات داوُد

و بعد صلاتنا و السلام.. على خير الأنام و  من ربه كثير السلام..

كان ياما كان في سالف العصر و الأوان..

نجوم كثير.. مكشوحة من بطن السماء.. بكم شكل ما أجملها.. ليلها تحتفل بيهو المواسم.. تقول عليهو إنكَب كَب.. من مكحلة.. لمّن علي تقوم تميل.. و تحكيهو قصص.. بسيطة و ممكن ملحمة.. و أنا فوق سرير.. مجدوع ممدوداً تحتها.. منداح لي كل يوم في حكاية.. لمن يغشاني الفزع.. الفي بياض سرباً لقمري.. يشق سواد الليل ده شق.. وفي هواه تحسه انخلع.. أو من حمار عاشقاً.. نهَق.. أو ممكن شان شاف ليهو شيطان..  بيذكرني.. انه أحسن لي أرجع أنوم.. و لسة قدامي الليل ردوم.. بس كنت بارجع لخيالي.. لنفس الحكاية و النجوم.. و أعيدها تاني..  قبل ماا يسبقني الزمن.. الآخره في درباً طويل.. تتزاحم أجرام السماء.. زي قشاًّ مكبوب أو تبن.. من خُرج كان إنكشح.. أو روباً ممكن.. أو لبن.. من قربةً كان إتدفق.. من فوق حمار ست اللبن.. الكان ملَك طاير وراه.. و من الضحك بطنه اتشرط.. و ديك الجيران.. كان أول واحد ليهو فطن.. و بدأ الصياح.. وقتها أنقلب و أديها ظهري.. ألحق لي غمضة.. قبل ما يهل الصباح.. 

(يتبع)

الشفيع 

حقوق الطبع و النشر و التوزيع محفوظة

أمجاد مقاتل

و بعد صلاتنا و السلام.. على خير الأنام.. و من ربه كثير السلام..

كان ياما كان في سالف العصر و الأوان..

رجال شباب و زي ورِد.. زاهر.. و في عمر الزهور.. الا انه أيام الصبا.. في بلادهم صبحت نكد.. و رغم بساطة طبعهم.. بساطة آمالهم و حلمهم.. الا انه آفاق البلد.. في وشوشهم ماا إتسدرت.. بأعتى سد.. و الوطة ضاقت عليهم.. و احلامهم صبحت بدد.. 

سابوا البلد.. و هجّوا لبلد.. طرز مشيهم شوارعها.. و لياليها ليهم اتضحكت.. لم اتكلكلت.. بمناهم الأذّن لصباحاتها.. ودوّب بالحيل مصابحها.. 

ظاقوا المُرة و كاسوها.. و اللقمة إن مرمية.. ما عافوها.. و إن إتلقت.. أبداً زول ليها ما خِتا.. و في قيلة الصيف إتشاركوا.. جغيمات موية بحرهم.. الباراهم لمن حفا.. و زيت فولهم كان ليهم ديمة.. مسوح شتا.. 

(يتبع)

الشفيع 

حقوق الطبع و النشر و التوزيع محفوظة

درويش

و بعد صلاتنا و السلام.. على خير الأنام.. و من ربه كثير السلام..

كان ياما كان في سالف العصر و الأوان.. 

سَموم و حراًّ بس هجير.. و شمساً كاوية مبالغة.. تحير الطير في سماه.. تنَدِّم أي كائن بيسير.. كنت في السوق متّكي.. باسمع لي في حوار.. و فَتي.. لشيخ صغيّر في الجوار.. و زي سراب أو طيف نهاري.. لمَحْته بس تقول شبَح.. فوق شارع السوق بيقطعه.. مشيته.. فت.. فت.. فت.. شبِح..  درويش جلابيته برُقَع.. في إيده كيس.. شايله و ماشي ليه في درب.. كإنه مرسوم ليهو رسم.. و وراه جاري كم صبي.. أظنهم كانوا مرَسّلين.. كل واحد كان في إيده شي..ممكن قريشات أو أكل.. بينمدو ليهو.. من غير ما يسأل.. أو يِتسإل..    

(يتبع)

الشفيع 

حقوق الطبع و النشر و التوزيع محفوظة

عيد

و بعد صلاتنا و السلام.. على خير الأنام.. و من ربه كثير السلام..

كان ياما كان في سالف العصر و الأوان..

قدمين ماشيات على مهل.. و فوقن ثوباً إنسدل.. أبيض لابساو حبوبة لي.. جمبن قدمين أصغر شوية.. على عجل.. ماا كانوا لي.. طَلعن من باباً كبير.. قطعن سوا بكل حذر.. خوراً صغيّر.. كان لي متعة و أمر هيّن.. بعد مأغافل حبوبة طبعاً.. مد شبشبي.. و لز حوافه الطينا ناشف.. و أسحبه قبل ما يغطس.. جوة لِبّه اللسّه ليّن.. و حبوبة تاخذ بالا مني.. في العادة بس كانت تعاين.. و استغرابا كنت باسمعه.. لمن يضمرن خدودا.. و صوت يطلع من ضغطتم.. في الباقي ليها من سنونا.. و يطلع سنين.. من بين قدّوما.. وقتا تقوم تجرني.. و لي طريقنا تضمني..    

(يتبع)

الشفيع 

حقوق الطبع و النشر و التوزيع محفوظة

زميلة

و بعد صلاتنا و السلام.. على خير الأنام.. و من ربه كثير السلام..

كان ياما كان في سالف العصر و الأوان..

لحظة إنتظار.. طويلة عادي و ما هي هينة.. ماا طبع كل ناسنا عامّة.. وده حالتو فيما تدعى.. عاصمة.. وقفْتَ قدام ظاهرة لنج.. نموذج من بنات حواء.. السفروهن و كفروهن.. و برغم ثوبن..  إتبادلوا السيطان عليهن..  حطّت في طرقات الوطن.. و من ناصيات كل الشوارع.. طلّن علينا في يوم عصيب.. كان هج فيو ظل الحبيب.. قل فيه زاته القرش.. في ما كتر الا الغلا.. و ما علا إلا النحيب.. 

(يتبع)

الشفيع 

حقوق الطبع و النشر و التوزيع محفوظة

صنوبرة

و بعد صلاتنا و السلام.. على خير الأنام.. و من ربه كثير السلام..

كان ياما كان في سالف العصر و الأوان.. 

تغريد عصافير و طيور.. برد و سلام.. إحساس ندي.. طمأنينة ملت الوجود.. راحة و سرور..

و العصافير كات تحوم.. في سماوات تب بسيطة.. زخرفتها شوية غيوم.. كات زقزقاتها مسهبة.. جدل جميل.. مرات يقل.. مرات يطول.. كلمات غزل..  يمكن عتاب.. يمكن شكل.. و بجد ما عرفت.. شن كانت تقول..

(يتبع)

الشفيع 

حقوق الطبع و النشر و التوزيع محفوظة

عبد القادر الجيلاني

و بعد صلاتنا و السلام.. على خير الأنام.. و من ربه كثير السلام..

كان ياما كان في سالف العصر و الأوان..

صوت و صداه.. من سوقنا لي حد البحر.. طوالي كنت باسمعه.. الصوت مظلل بالتعب.. بس ما فتر.. كان خالِطه شوية عند.. و فيهو همة.. و برضه كل طيبة البلد:  "عبد القادر الجيلاني.. أمك يزور الجنة.. أبوك يزور الجنة.. و عبد القادر الجيلاني.."

(يتبع)

الشفيع 

حقوق الطبع و النشر و التوزيع محفوظة

كنيسة

و بعد صلاتنا و السلام.. على خير الأنام.. و من ربه كثير السلام..

كان ياما كان في سالف العصر و الأوان.. 

في حينا.. معبد جديد من غير عمدان.. ما ليهو قبة.. أو منه يطلع صوت أذان.. و يوماً زي آخر العصير.. نويت أسجل ليو زيارة.. و ما كانت زي أي زيارة.. الطريق كانت قصيرة.. إلا الفهم إلا العوينات.. كانت الحواجز و المسافة.. شيتاً علي ما كان عصيب.. ولا شلت ليهو أي مخافة..

(يتبع)

الشفيع

حقوق الطبع و النشر و التوزيع محفوظة