أمجاد مقاتل

و بعد صلاتنا و السلام.. على خير الأنام.. و من ربه كثير السلام..

كان ياما كان في سالف العصر و الأوان..

رجال شباب و زي ورِد.. زاهر.. و في عمر الزهور.. الا انه أيام الصبا.. في بلادهم صبحت نكد.. و رغم بساطة طبعهم.. بساطة آمالهم و حلمهم.. الا انه آفاق البلد.. في وشوشهم ماا إتسدرت.. بأعتى سد.. و الوطة ضاقت عليهم.. و احلامهم صبحت بدد.. 

سابوا البلد.. و هجّوا لبلد.. طرز مشيهم شوارعها.. و لياليها ليهم اتضحكت.. لم اتكلكلت.. بمناهم الأذّن لصباحاتها.. ودوّب بالحيل مصابحها.. 

ظاقوا المُرة و كاسوها.. و اللقمة إن مرمية.. ما عافوها.. و إن إتلقت.. أبداً زول ليها ما خِتا.. و في قيلة الصيف إتشاركوا.. جغيمات موية بحرهم.. الباراهم لمن حفا.. و زيت فولهم كان ليهم ديمة.. مسوح شتا.. 

(يتبع)

الشفيع 

حقوق الطبع و النشر و التوزيع محفوظة

درويش

و بعد صلاتنا و السلام.. على خير الأنام.. و من ربه كثير السلام..

كان ياما كان في سالف العصر و الأوان.. 

سَموم و حراًّ بس هجير.. و شمساً كاوية مبالغة.. تحير الطير في سماه.. تنَدِّم أي كائن بيسير.. كنت في السوق متّكي.. باسمع لي في حوار.. و فَتي.. لشيخ صغيّر في الجوار.. و زي سراب أو طيف نهاري.. لمَحْته بس تقول شبَح.. فوق شارع السوق بيقطعه.. مشيته.. فت.. فت.. فت.. شبِح..  درويش جلابيته برُقَع.. في إيده كيس.. شايله و ماشي ليه في درب.. كإنه مرسوم ليهو رسم.. و وراه جاري كم صبي.. أظنهم كانوا مرَسّلين.. كل واحد كان في إيده شي..ممكن قريشات أو أكل.. بينمدو ليهو.. من غير ما يسأل.. أو يِتسإل..    

(يتبع)

الشفيع 

حقوق الطبع و النشر و التوزيع محفوظة

عيد

و بعد صلاتنا و السلام.. على خير الأنام.. و من ربه كثير السلام..

كان ياما كان في سالف العصر و الأوان..

قدمين ماشيات على مهل.. و فوقن ثوباً إنسدل.. أبيض لابساو حبوبة لي.. جمبن قدمين أصغر شوية.. على عجل.. ماا كانوا لي.. طَلعن من باباً كبير.. قطعن سوا بكل حذر.. خوراً صغيّر.. كان لي متعة و أمر هيّن.. بعد مأغافل حبوبة طبعاً.. مد شبشبي.. و لز حوافه الطينا ناشف.. و أسحبه قبل ما يغطس.. جوة لِبّه اللسّه ليّن.. و حبوبة تاخذ بالا مني.. في العادة بس كانت تعاين.. و استغرابا كنت باسمعه.. لمن يضمرن خدودا.. و صوت يطلع من ضغطتم.. في الباقي ليها من سنونا.. و يطلع سنين.. من بين قدّوما.. وقتا تقوم تجرني.. و لي طريقنا تضمني..    

(يتبع)

الشفيع 

حقوق الطبع و النشر و التوزيع محفوظة

زميلة

و بعد صلاتنا و السلام.. على خير الأنام.. و من ربه كثير السلام..

كان ياما كان في سالف العصر و الأوان..

لحظة إنتظار.. طويلة عادي و ما هي هينة.. ماا طبع كل ناسنا عامّة.. وده حالتو فيما تدعى.. عاصمة.. وقفْتَ قدام ظاهرة لنج.. نموذج من بنات حواء.. السفروهن و كفروهن.. و برغم ثوبن..  إتبادلوا السيطان عليهن..  حطّت في طرقات الوطن.. و من ناصيات كل الشوارع.. طلّن علينا في يوم عصيب.. كان هج فيو ظل الحبيب.. قل فيه زاته القرش.. في ما كتر الا الغلا.. و ما علا إلا النحيب.. 

(يتبع)

الشفيع 

حقوق الطبع و النشر و التوزيع محفوظة

صنوبرة

و بعد صلاتنا و السلام.. على خير الأنام.. و من ربه كثير السلام..

كان ياما كان في سالف العصر و الأوان.. 

تغريد عصافير و طيور.. برد و سلام.. إحساس ندي.. طمأنينة ملت الوجود.. راحة و سرور..

و العصافير كات تحوم.. في سماوات تب بسيطة.. زخرفتها شوية غيوم.. كات زقزقاتها مسهبة.. جدل جميل.. مرات يقل.. مرات يطول.. كلمات غزل..  يمكن عتاب.. يمكن شكل.. و بجد ما عرفت.. شن كانت تقول..

(يتبع)

الشفيع 

حقوق الطبع و النشر و التوزيع محفوظة

عبد القادر الجيلاني

و بعد صلاتنا و السلام.. على خير الأنام.. و من ربه كثير السلام..

كان ياما كان في سالف العصر و الأوان..

صوت و صداه.. من سوقنا لي حد البحر.. طوالي كنت باسمعه.. الصوت مظلل بالتعب.. بس ما فتر.. كان خالِطه شوية عند.. و فيهو همة.. و برضه كل طيبة البلد:  "عبد القادر الجيلاني.. أمك يزور الجنة.. أبوك يزور الجنة.. و عبد القادر الجيلاني.."

(يتبع)

الشفيع 

حقوق الطبع و النشر و التوزيع محفوظة

كنيسة

و بعد صلاتنا و السلام.. على خير الأنام.. و من ربه كثير السلام..

كان ياما كان في سالف العصر و الأوان.. 

في حينا.. معبد جديد من غير عمدان.. ما ليهو قبة.. أو منه يطلع صوت أذان.. و يوماً زي آخر العصير.. نويت أسجل ليو زيارة.. و ما كانت زي أي زيارة.. الطريق كانت قصيرة.. إلا الفهم إلا العوينات.. كانت الحواجز و المسافة.. شيتاً علي ما كان عصيب.. ولا شلت ليهو أي مخافة..

(يتبع)

الشفيع

حقوق الطبع و النشر و التوزيع محفوظة

ثلاثة أصحاب

و بعد صلاتنا و السلام.. على خير الأنام.. و من ربه كثير السلام..

كان ياما كان في سالف العصر و الأوان.. 

غوريلا  في قلعة حلب.. ما قصدنا الكائن الثدي.. الينا معاه حسب العلوم..  في الوجود بالحيل نسب.. و بخصوص حلب.. و لا هم كمان ناسنا الحلب..

كان شرع قلعة حلب.. حرية لكل البهايم.. تسرح و ترعى في الحشيش.. كيف ما تحب و زي ما تريد.. الا للغوريلا كان سبب.. بسوء فهم .. أو يعني ساي قلة أدب.. كانت تخش بعض البيوت..  تاكل و تشبع من حشيشا.. و بعدين تغور.. طَبع ما رضت بيه الضواري.. لا الزواحف لا الطيور..

(يتبع)

الشفيع

حقوق الطبع و النشر و التوزيع محفوظة

مقدمة

  في كل ليلة قبل ما أنوم.. بتعدي أطيافاً علي.. لذكريات و أحداث قديمة.. جديدة ممكن.. أو حتى ما انكتبت فصول.. إلا انها زي خمراً معتق.. أو مريسة.. براها فضلت.. و قعدت تجول..  ملآنة أشخاص و أنا ليها شاخص.. و بينهم زي عابر سبيل.. و ده حالنا في الدنيا القصيرة.. كلنا ما عابرين سبيل.. و فجأة تنقلب الأماكن.. و ألاقي نفسي في بليد صغير.. وين ما اتولدت.. و زي صوت قديم لأحباب كثير و حبوبات.. يقعد و يحكي بكل حنين.. فيهو الفرح فيهو الحزن.. فيهو ابتهاج فيهو الأنين.. فيهو مواساة و إعتراف.. و فيهو برضه حاجات كثير.. حكاوي جد من غير نظير..  بس ما كلام.. طوفان أحاسيس و زي رؤى.. من غير نظام.. قلت اتذكر البتذكره.. و أحكي كل البقدره.. قبل ما الأيام تطير.. و بشوية حروف.. في الوريقات دي أمثِّله.. ما هم كثير..

الشفيع

حقوق الطبع و النشر و التوزيع محفوظة